Freehängich

Än Faohraod krächte verehrt mo dr Pfarr,
dar hett sich viellicht gefräit –
im’s richtig ze larnen, iebete ar
värrhar uff dr Hooberäit.

Dr Jingste nitt meh un veele zü fatt,
do äß Bewajung gesuind.
Ha semmste baale, statt daß ha gebatt,
wee wild im de Kärchen ruind.

Dann woogte ha sich uff de Strooßen nüs,
Vrbie an ämm Kinnertropp.
S sogk nach än bischen tapperich üs
Am schäiben Kärchieberkopp.

De Hänge issern am Länker un starr,
ha uff dam Drohtesel saoß.
Do krehlten welche: Freehängich, Härr Pfarr,
do maocht daos veele meh Spaoß!

Do hull ha aon uff’em Glichen ungn –
Se wässen amm, wee’me daos maocht.
Dann maochte ha’s nooch dan Lüsejungen,
dee hunn – na hunn’se gelaocht?

De Klingel schuuchte värr Fräide bimbim,
Hochwirden fuhrwarkte sich warm.
Zum Schinger – war kimmt im de Ecken rim?
Natierlich dr Härr Schandarm.

Freehängich, daos kostet zwäi Mark. Stiet ob!
Dan Sinder ha stoppen dott.
Hochwirden amm kiebich zur Aintwort gobb:
Mo sachte, mich lenkt dach Gott!

„Wie? Was? Dar sitzt do äh nach meet druff?
Daos äsche än bischen stark.
S’salbe nammo – un rät Üch nitt uff:
S maocht zesammen vier Mark!“